NAGHIKOT sa iyang liog ang usa ka bana dihang napalgan sulod sa iyang panimalay sa Zone-6, Capisnon, Barangay Kauswagan, dakbayan sa Cagayan de Oro.

Patay si Prodencio Galacio Palarca, 54, minyo ug residente sa nahisgutang dapit.

Sa nahipos nga impormasiyon gikan sa kapulisan sa Police Station 4 (PS4) sa Carmen, gikabutyag nga naabtan na lamang sa mga otoridad si Palarca sa kusina nga bahin sa balay human nga giputol na sa mga paryente niini ang pisi nga gihikot sa iyang liog.

Giingong nakahikot ang pisi sa mismong liog niini ug gihikot usab kini sa usa ka kahoy sa taas nga bahin sa balay.

Gibutyag ni Police Senior Inspector Demver Vergara, hepe sa PS4, nga subay pa sa asawa sa biktima nga ikaduha na nga higayon nga misulay sa pagpakamatay ang bana niini tungod sa stress.

“Sa pag-imbestiga ng tropa sa asawa, second attempt na niya ni, na nag-attempt na paghikog, kay kanang mentally stress daw tong biktima,” pahayag ni Vergara.

Dali pa kining gidala sa kapulisan sa J.R Borja Hospital sa pagtuo nga aduna pa’y pulso ug maluwas apan wala’y swerteng nakabsan na kini sa hinulamang kinabuhi sa dihang nahidangat sa tambalanan.

Human sa panghitabo, ang patay nga lawas ang gidala sa Bollozos Funeral Homes sa Bulua samtang nagdumili na ang pamilya sa pagpa otopsiya sa patay niini nga lawas gumikan kay wala ma’y nakitang foul play ug tungod na usab sa pagtoo nga naghikog kini tungod sa stress.