TRANSPORT strike ang bahad sa mga nanag-iya og bao-bao ug motor sidecar human sila gidid-an pagbiyahe sa highway.

Sa post sa social media sa usa ka grupo sa mga drayber, nag-aghat kini sa mga drayber sa bao-bao ug motor sidecar nga dili mobiyahe karong semanaha sugod Miyerkules hangtod sa Biyernes aron ipakita sa gobyerno kung unsa ang panginahanglanon sa mga sumasakay kung walay magdagan nga mga bao-bao sa kadalanan.

Samtang naghangyo og pagsabot ang lokal nga kagamhanan sa dakbayan sa Cagayan de Oro ngadto sa mga nagmaneho sa bao-bao human gipahigayon ang pagpangdakop niini niadtong nilabay nga adlaw sa Barangay Tablon, ning dakbayan.

Gibutyag ni Teodoro Sabuga-a, city administrator, nga unta masabtan sa mga drayber nga kini ginadili sa balaod ug alang lamang kini sa ilang seguridad ug sa mga pasahero.

"I hope masabtan sab na nila kay ang security man pud sa ila mismo ug sa ilang mga pasahero ang nakabutang diha," matud ni Sabuga-a.

Gidugang pa niini nga balaod kini ug lakagon usab ang lokal nga kagamhanan sa tinugyanan sa Department of the Interior and Local Goverment kung dili kini ipatuman.

Nangita na usab og alternatibong pamaagi ang dakbayan aron usab matabangan nga dili usab mawad-an og mga panginabuhian ang mga nanag-iya niini.

Apan, giklaro ni Sabuga-a nga ginadili sa mga highway ang bao-bao tungod kay wala kini gidesinyo sa mga national highway gani huyang kini ug mahimong mapalid kung malabyan og dagkong mga sakyanan.

Gani, daghan na ang mga naaksidente sa kadalanan nga sakay niining bao-bao.

"Lantawon namo kung naa ba kaha tay barangay-to-barangay road nga gabuhaton. Instead of going to the highway, mangita ta og another alternative road nga didto sila moagi," dugang pa.

Nasayran nga niadtong nilabay nga adlaw, daghan sa mga sumasakay ang nagbaklay human usab nga gatosan ka mga bao-bao ang gipangsikop.