KARON nga nasulod na sa partylist sa umalabot nga eleksyon sa Mayo ang Ako PaDayon Pilipino, prayoridad nga programa nga ilang gihingusgan karon ang barato nga power supply sa Mindanao.

Kini tungod kay mao ang nag-unang problema sa mga kunsumidor labina nga kanunay masinati ang brownout.

Si Edmundo Pacamalan nga tigpamaba sa partido PaDayon Pilipino nibutyag sa SunStar SuperBalita nga ang founder niini nga si kanhi gobernador ug mayor Dongkoy Emano uban sa iyang mga anak nga si Governor Bambi Emano ug Councilo Nadya Emano buot nga representahan kini sa mga personahe sa mga electric cooperative.

“Ang mga Emano gihatag niya kini nga pabor sa mga electric cooperatives para sa ilang advocacy for reliable nd affordable supply of electricity,” matud ni Pacamalan.

Duha ka mga nominado nga maoy morepresentar niini ang gipilian karon sa partido nga mao ang unang nominee si Adrian Ebcas ang general manager sa Camiguin Electric Cooperative (Camelco) ug second nominee mao si Rey Carpio Sindo kinsa presidente ug Board of Directors sa Surigao del Sur Electric Cooperative sa Tandag City.

Laraw sab niini nga party list nga matukod ang Mindanao Power Corporation aron dili na mamroblema ang mga kunsumidor panahon nga kulangon og suplay sa kuryente.