Patay na dihang nahidangat sa tambalanan ang usa ka batan-on human nalumos samtang nangaligo sa Kagay-an Lawndale Spring resort sa Tagu-anao, Barangay Indahag, dakbayan sa Cagayan de Oro.

Patay si James Cloyd Casiño, 16, taga #16 B2 L9, Talongan, Calaanan relocation site ning dakbayan.

Sa nahipos nga impormasiyon gikan sa kapolisan sa Police Station 2 (PS2) sa Cogon, gikabutyag nga napalgan na lamang nga nalumos ang batan-on sa Olympic swimming pool niadtong Dominggo sa buntag, Mayo 6.

Giingong nakita kini sa mga lifeguards nga sila si Jesus Javier, Alexis Ceasar Rosales ug Lorenzo Almonte diin dali pa kining girespondehan.

Nagpahigayon og Cardio Pulmonary Resuscitation (CPR) ang maong mga life guards aron kini maluwas ug dali nga gidala sa tinugyanan sa City Disaster Risk Reduction Management Desk (CDRRMD) sa J.R Borja Hospital apan gideklara kining patay.

Samtang sa bahin sa inahan, gikabutyag nga wala nila kini nabantayan ug sa pagpaniudto na nakurat na lamang kini sa dihang wala na ang biktima.

Giingong gipangita kini apan nataod-taoran pa kini ayha nakita human nga natumban kini kinsa nagkulob sa ilalom nga bahin sa swimming pool.

Sa pagkakaron, ang patay nga lawas ang gi-atiman na sa nahabiling pamilya sa biktima.