SEX ug kwarta ang gidemanda sa usa ka drayber ngadto sa tag-iya sa nahabiling cellular phone niadtong Disyembre 4 mga alas 9:46 sa gabii sa siyudad sa Cagayan de Oro.

Sikop si Jeffrey Ramoso, 25, dunay kaipon ug usa ka drayber og taxi ug residente sa Paglantaw, Camaman-an, sa siyudad.

Sa impormasiyon gikan sa kapulisan sa Police Station 2 (PS2) sa Carmen, gikabutyag nga nagpakitabang sa otoridad si Roselyn, 25, taga Camaman-an, human mi-demand si Ramoso og sex ug P2,500 hulip sa iyang cellular phone nga Samsung J2 nga anaa sa P16,000.

Apan gihimakak ni Ramoso ang alegasyon apan gi-angkon nga iya lang kining nabutyag ngadto sa biktima.

"Dili na tinuod, nakaingon lang lage ko ato," matud sa suspek.

Gibutyag sa suspek nga gikan ang biktima sa Ayala pauli sa ilang dapit apan nabiyaan ang celfon niini rason nga nakahunahuna kini sa pagdemanda sa maong butang.

"Gikan siya sa Ayala paingon sa Camaman-an. Murag nagdali kay iyang nabiyaan," dugang pa.

Gitakdang ipasaka ang kaso batok sa nahisgutang suspek, kinsa kasamtangang nagtingkagol sa bilanggoan sa PS2.

Nagpahimangno usab ang kapulisan nga dili mahadlok nga motaho ngadto sa mga otoridad sa susama niini ug kanunay nga magbinantayon.