TUNGOD sa grabe nga kainit sa panahon nagpahimangno ang City Health Office (CHO) nga angay bantayan ang mga pagkaon gumikan kay dali ra kining mapan-os tungod ning nasinati nga kainit sa panahon.

Miingon ni Dra. Fe Bongcas, sa City Health Officer, nga dapat bantayan sa katawhan ang preparasiyon sa pagkaon.

“Ang food preparation dapat gyud tutukan nila kay especially karon tungod sa kainit dali ra ma-spoil ang pagkaon,” matud ni Bongcas.

Gidugang pa niini nga kinahanglan nga dili pasagdan ang mga pagkaon nga ibutang lang sa bisan asa ug kinahanglan kini ibutang sulod sa refrigerator aron malikay sa mga sakit nga dala sa napan-os nga pagka-on.

Kanunay usab kini nga nagpahimangno sa katawhan nga magdala og mga proteksiyon sa lawas batok sa kainit sa panahon sama sa payong, kalo ug kanunay nga mu-inom og tubig ug kung mahimo likayan gayud ang mga dapit diin nagpunsisok ang katawhan tungod kay diha makuha ang mga sakit.