“SIYA na mismo nag-angkon nga ayha ra siya mopirma kung kanus-a niya gustohon, dili ba na diktador,” kini ang gibutyag ni Provincial Board member Prexy Elipe.

Kini kalabut sa giingong langan nga pagpirma ni Bise Gobernador Joey Pelaez sa mga ordinansa ug resolusyon alang sa kalungsoran sa Misamis Oriental.

Gipasabot ni Elipe nga ang pagpirma sa mga resolution ug ordinansa usa sa mahimong rason nganong mabalda ang serbisyo sa katawhan sa matag lungsod.

Niaging session nihangyo si Elipe isip question of privilege nga giingong gikasuko ni Pelaez, hinungdan adunay mga dili maayong pagsinabtanay.

Giingong gipangutana ni Elipe si Pelaez nganong wala makagawas ug mapirmahan ang mga resolusyon ug ordinansa para sa lain-laing munisipyo, kung asa ang uban niadto pang miaing tuig naaprubahan sa board.

Nakakwestyon sab si Elipe sa gitawag niining mala “diktador” nga pangatungdanan ni Pelaez human giangkon niining mopirma lamang kini sa mga dokumento kung gustohon niini.

Gidudahan nga tungod dili kaalyado hinungdan nga gadugay dugayon niini ang pagpirma.

Gikuhaan pa og reaksyon sa SuperBalita si Bise Gobernador Pelaez kalabot niini apan wala pay reply.