DILI makatarunganon nga ang kasundalohan motawag dayon sa mga pulitiko nga terorista kon sila nagsuporta sa New People’s Army (NPA).

Gibutyag ni Misamis Oriental Governor Bambi Emano nga dili patas nga tawgon og terorista kay walay mga pulitiko nga nagsuporta sa walhong grupo apan mas mosuporta hinuon sa programa sa gobyerno nga ipasurender ang maong grupo.

“Nah, I don’t think it’s fair. Kung moingon sila nga mosuporta sa NPA terorista. Walay mayor, governor nga gasuporta sa CPP-NPA mao na ang klaro,” matud ni Emano.

Gani ning bag-o, 45 ka mga surrenderee nga mga NPA sa Misamis Oriental ang lakip sa gihatagan og ayuda sa Kapitolyo Probinsya pinaagi sa Provincial Social Welfare and Development (PSWD) diin gihatagan sila og P4,000 nga cash assistance matag usa.

Dugang ni Emano nga suportado niya ang programa sa sundalo ug ni Presidente Rodrigo Duterte.

Kahinumduman gibutyag ni Capt. Regie Go, kinsa tigpamaba sa 4th Infantry Division (4ID), nga aduna silay mga gimonitor nga mga pulitiko nga daw gahatag ug gasuporta sa mga walhong grupo tungod susama gihapon sa mga terorista.

Gibaharan sab nila ang mga pulitiko nga nalambigit niini nga undangon kini kung dili mawad-an og benipisyo.