GIPAABOT sa Police Regional Office (PRO)-Northern Mindanao nga miubos ang ihap sa krimen sa rehiyon.

Kini ang gikumpirma ni PRO-Northern Mindanao spokesperson Police Lieutenant Colonel Mardy Hortillosa.

Gibutyag niini sa Superbalita Cagayan de Oro nga atol sa ilang bag-o lang nga command conference, gireport sa mga station commander nga human gipatuman ang curfew ug mga community quarantine sa pipila ka lalawigan, siyudad, ug kalungsoran.

Ang mga focused crime sama sa murder, homicide, theft, robbery, carnapping, physical injury, ug rape.

Gani adunay usa ka semana nga usa lamang ang natala sa focus crime sa rehiyon dihang gisugdan pagpatuman sa community quarantine.

Apan gitutokan karon sa kapulisan ang posibleng kaso sa pagpangawat ning daghan ang apektado ang panginabuhian sa katawhan human daghan sa mga establismento ang sirado.

"Usa gyod na sa atong gilantaw karon nga walay robbery o kawat nga mahitabo labina daghan ang naapektuhan karon," matud ni Hortillosa ug miingon nga alerto 24 oras ang kapulisan sa paghatag seguridad labina ang pag manned sa mga community quarantine checkpoint.