HUMAN gisublian sa laing termino si Konsehal Lordan Suan niadtong nilabay nga eleksiyon, buot niini nga mapalabang na ang giduso nga "free parking" sa siyudad sa Cagayan de Oro.

Atol sa unang higayon niini nga pagtambong sa pagpakayab sa nasudnong bandila sa City Hall, gibutyag ni Suan nga buot niya nga mapadayon ang giduso kaniadto nga libreng mga kaparkingan sa mga sakyanan diha sa mga komersyal nga mga distrito.

"Wala man gud to napadayon sa last nga term sa 17th City Council mao nang gusto nako i-lobby," matud ni Suan.

Giingong buot usab niini nga makahupot og bag-ong komitiba sa 19th City Council alang sa paglambo niini isip konseho sa siyudad ug makasulay og managlahing masinatian diha sa iyang pagpangatungdanan.

Sa 18th Council, si Suan ang tsirman sa blue ribbon committee.