NAPALGANG nagbula na ang baba sa usa ka fruit vendor human gidudahang naghikog kagahapon sa Hulyo 2, mga alas 11:00 sa gabii sa Brgy. Kabulakan, lungsod sa Balingoan, Misamis Oriental.

Si Police Officer 1 Ulysses Tinabla sa Balingoan Police Station miila sa biktima nga mao si Renato Balat, 64.

Matud ni Tinabla nga wala silay nakitang foul play sa kamatayon niini gumikan sa ilang pagresponde nakitang naghitak ang botelya sa insecticide nga maoy gitouhang giinom sa biktima.

Nagbula na sab ang baba niini dihang napalgan ug tupad pa sa biktima ang daghan sulat o mga suicidal notes.

Sa maong sulat iyang gipasabot nga aduna siyay mga utang nga dili niya mabayran.

Gani usa sa sulat nga nakahatag atensyon sa kapolisan mao ang mosunod.

"Diri rako i vigil kay diko kabayad og punerarya kay utang ang hinungdan ining tanan." Nakalatid sa sulat nga gibilin.

Kumbinsido sab ang paryente niini nga walay foul play sa kamatayon sa biktima ug intensyon niining hunuson ang iyang kinabuhi.

Niani sab og daghang reaksyon ang paghikog sa biktima gumikan kay daw talagsaon ra sa panahon karon nga dunay gaproblema sa utang tungod sagad gapabungol bungol lamang.