GIKLARO sa tinugyanan sa J.R. Borja General Hospital (JRBGH) sa siyudad sa Cagayan de Oro nga walay kamatuoran ang mga ninggawas nga mga taho nga walay fluids ug mga tambal sa city hospital atol sa groundbreaking niadtong Huwebes, Mayo 2.

Giingong dunay mga nanggawas nga walay dextrose sa maong ospital lakip na mga tambal hinungdan nga gipakita sa tinugyanan sa maong ospital ang kinarton nga mga tambal ug fluids ngadto sa personahe sa media.

Sa pakighinabi kang Dr. Ramon Nery, tsirman sa city hospital, nga walay kamatuoran ang maong mga alegasiyon ug gani duna pa silay gipaabot nga 30,000 ka mga botelya sa fluids gumikan na usab kay wala pa may insaktong kabutangan sa kamulong gitrabaho nga ospital.

“So we are expecting a delivery of 30,000 bottles among gi-hold kay wala paman gud mi saktong mabutangan, palit na to among ga staggered ang delivery kay wala lage kabutangan kay sensitibo biya na sa temperature, there is a certain temperature para sa warehousing,” matud ni Nery.

Gidugang pa niini nga gani ang city hospital ang usa sa dunay pinakabaratong presyo sa fluids sa tibuok Pilipinas.

“Like our dextrose now has remained to be one of the lowest price dextrose sa tibuok Pilipinas, P34.00 per bottle sa pagsugod mga P80, bulk purchase unya bidding man gud ni sa city hall,” dugang niini.

Giklaro usab ni Nery nga libre ang tanang mga tambal sulod sa maong ospital ug kung dili kini mapalit sa maong balay tambalanan andam usab nga mo-refund ang city hospital kinahanglan nga ipakita lamang ang mga resibo.

Nasayran nga kasamtangang anaa sa 20 footer air conditioned container van ang kinarton nga mga fluids kon mas nailang dextrose ug sa ubang mga lawak sa maong ospital lakip na ang mga tambal.

Kahinumdoman nga sunod-sunod ang kalamboan sa maong ospital diin pinakaulahing ground breaking ceremony sa perimeter road, kanal ug landscaping nga gigahinan og pundo sa lokal nga kagamhanan sa siyudad nga anaa sa P12 milyones.