TUNGOD sa hulga niining nikuyanap nga African Swine Fever (ASF) diha sa mga mananap labi na sa baboy, nagplano ang siyudad sa pagpalit og dugang K-9 nga maka-detect sa mga kontaminadong produkto.

Gibutyag ni Konsehal Romeo Calizo, tsirman sa police, fire and public safety committee, nga duna nay mga hulga sa mga pagkaon, rason nga gawas sa gitunol nga pito ka mga K-9 nga napalit sa siyudad alang sa Cagayan de Oro Police Office (Cocpo) alang sa mga narcotics ug explosives, nagplano usab nga magdugang og pagbansay-bansay og K9 alang sa ASF.

"Karon, naay ASF. Reportedly, naa'y mga meat products nga contaminated with ASF. Technology can hardly detect. We plan to procure again dogs train on ASF," matud ni Calizo.

Gidugang pa nga kung ugaling ma-aprobahan kini, lahi usab kini nga training sa mga iro.

"Separate, kay dili man pwedi multiple task ang iro," dugang pa.

Nasayran nga ang pito ka mga K-9 nga gi-donar sa siyudad ngadto sa Cocpo anaa sa kantidad nga P3.5 milyones nga lakip na ang training niini kauban sa ilang mga tagsa-tagsa ka mga handler.