GIINGONG walay kamatouran ang report nga daghan sa mga sakop sa New People’s Army (NPA) ang misurender ug mibalik sabakan sa gobyerno.

Kini ang gibutyag ni Ka Sandara kinsa tigpamaba sa CPP-NPA East Mindanao atol sa interbyu sa Superbalita pinaagi sa telepono.

Matud niini nga kun daghan ang nanurender sa ilang grupo nganong sige panawagan ang mga sundalo nga manurender na.

“Kung daghan mibalik sa gobyerno nganong sige man gihapon sila hangyo kanamo nga manurender. Gisumhan nami og sige balik-balik anang ilang sige panawagan nga manurender,” matud ni Ka Sandara ug miingon nga pasalig lamang ang mga programa sa gobyerno.

hinuon gibutyag niini nga aduna sab pipila nga dili mapugngan nga manurender ug ila kining girespeto ang mga desisyon.

Giklaro sab niini nga wala sab sukad mahitabo nga gikan sa pagka miyembro sa NPA namalik ang mga nanurender.

Dugang ni Ka Sandara nga anaa sab sa ilang balaod nga dili modawat og minor de edad sa recruitment apan daw aduna gyod pipila nga bout gyod mouban sa ilang kausa.

Gipaabot sab ni Ka Sandara nga lig-on ang ilang pundasyon ug ang tinoud nga NPA ang lig-on sa ilang gipanumpaan ug dili gapahaylo labaw sa tanan dili manurender.