ANAA sa 250 ka mga batan-on ang nanumpa atol sa gipahigayong paglusad sa programa nga Kabataan Kontra Droga at Terorismo sa conference room sa Barangay Nazareth, siyudad sa Cagayan de Oro, niadtong Biyernes, Mayo 3.

Kini programa sa kapulisan nga gilusad lakip na usab ang programa sa Non-Government Organization nga Ang Suhol Iwaksi Natin (Asin) ug Itaguyod ang Ligal at Wasto (Ilaw) alang sa nagkaduol nga eleksiyon.

Sa pakighinabi kang Police Major Rey Gaudencio Taboclaon, deputy chief sa Police Community Relations Unit sa Cagayan de Oro Police Office, gibutayg nga tumong niining maong kalihokan nga mapalayo ang mga batan-on sa ilegal nga druga ug terorismo.

“Para ma-aware ang mga kabatan-onan, to go away with illegal drugs and terrorism, actually sa atong record medyo gani niubos na apan dili ta complacent niani para mas madugangan pa gyud ang figure, maubos pa ang number sa mga kabatan-onan nga ni engage sa illegal drugs,” matud ni Taboclaon.

Samtang nibutyag usab si Major Anshary Pumbaya, tsirman sa Task Force Oro, nga kini nga kalihokan usa ka estratihiya aron nga dili mapaingon sa mga sayop nga dalan ug maaghat ang batan-on sa mga pagpangilad sa mga walhong grupo ug terorismo.

“The 4th ID, Task force Oro usa sa among campaign kaning anti-terrorism, one of our preventive measures is to engage the youth sa mga strategies para hindi naman sila mapunta sa ibang organisasiyon, we need to educate the youth kasi sa stage nila they are vulnerable stakeholder wherein nakita nato sa previous especially in Marawi siege,” dugang ni Pumbaya.

Samtang gilusad usab ang Asin ug Ilaw nga tumong niini nga makab-ot ang limpyo, matinud-anon ug patas nga eleksyon ilabi na aron nga malikayan dili lamang sa mga batan-on diha sa pagbaligya sa mga boto karong umaabot nga Mayo 13 nga eleksyon.