KALAMPOSAN alang sa kapolisan ang pagka promote kanila sa ilang tagsa tagsa ka posisyon human niadtong adlawng Lunes pormal nga gihatagan sila og promosyon sa Police Regional Office-Northern Mindanao.

Gibutyag ni Police Superintendent Surki Serenas, kinsa tigpamaba sa PRO-Northern Mindanao, nga sa kinatibuk-an adunay 2,572 ka mga promoted nga mga pulis dinhi sa Northern Mindanao nga gilangkoban sa lima ka mga lalawigan.

Adunay 1,499 ka mga Police Officer 2; moabot sab sa 622 ang Police Officer 3; Senior Police Officer 1 nga 167; Senior Police Officer 2 nga 29; Senior Police Officer 3 nga 52; Senior Police Officer 4 nga 22; Police Inspector nga 9; Police Senior Inspector nga 10; ug Police chief inspector nga 3.

Adunay 159 nga lateral hinungdan moabot ngadto sa 2,572 ang promoted sa Northern Mindanao.

Ang donning ug pinning of ranks gipangunahan ni PRO-Northern Mindanao Regional Director Police Chief Superintendent Timoteo Pacleb kinsa mihatag og undanon nga mensahe pagpaabot ngadto sa iyang ginsakopan.

Karon nga ubos ang kriminalidad sa rehiyon gipaabot ni Pacleb nga gamiton sa tarong ang ilang mga promosyon ug ipadayon ang ilang kaikag sa pagukod sa mga kriminal, pagpuhag sa ginadili nga druga ug padayon nga paghatag seguridad ug kahapsay sa ilang tagsa-tagsa ka area.