SIKOP ang Barangay Kapitan ug Kagawad ug laing indibidwal human nasapon nga nagsugal niadtong Miyerkules sa Quirino street, Brgy 31, Cagayan de Oro City.

Naila ang mga dinakpan nga sila si Kapitan Diosdado Wabe, 58 ug Brgy Kagawad Jessie Wabe, 45, minyo.

Lakip sa nasikop si Henry Lomonsod, 43, walay trabaho ug Warren Hancobela, 33, ulitawo , salesboy kinsa pulos residente sa maong barangay.

Sa impormasiyon gikan sa Police Station 2 (PS2) sa Cogon gikabutyag nga nagpahigayon og joint gambling operation ang Criminal Investigation and Detection Group (CIDG) ug sa PS2 sa pagpangulo ni PCapt Ernesto Sanchez niadtong Abril 1 mga alas 2:30 sa hapon.

Giingong nasapon mismo ang maong mga dinakpan nga nagdula og mahjong ug nakumpiska ang P291.00 nga sugal, set sa mahjong tiles, pad color brown, mahjong table ug dice.

Ang mga nakumpiska nga mga ebedensiya ang gidala na na sa buhatan sa CIDG Mis Or Office alang sa dokumentasiyon ug tukmang disposasiyon samtang ang kaso nga paglapas sa P. D 1602 ang gihan-ay na aron mapasaka sa korte.