ANAA na sa 9,879 ang kinatibuk-ang ihap sa mga kaso sa coronavirus disease (Covid-19) sa Cagayan de Oro human nakatala kini og 109 ka mga kaso sulod sa duha ka adlaw, pulos mga local transmissions.

Sumala sa report sa City Health Office, sa 109 ka mga bag-ong lokal nga mga kaso, 62 ang mga local index nga mga kaso, 26 ang mga close contacts sa mga pasyenteng nagpositibo sa coronavirus, pito ang mga lokal authorized persons outside residence (Apors), lima ang mga local Apors with link, ug siyam ang mga patay.

Miubos ang ihap sa mga aktibo nga kaso sa Cagayan de Oro, aduna nay 1,140 ka mga kaso. Sa maong numero, 308 niini na-admit sa Northern Mindanao Medical Center ug uban pang mga ospital sa syudad ug 832 ang mga outpatients.

Nakatala usab og 162 ka mga Covid-positive nga mga kaso nga karon naka-recover. Anaa na karon sa 8,279 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad anaa na sa 460.