DEAD on arrival sa balay tambalanan ang usa ka lalaki kinsa misukol sa kapulisan atol sa buy-bust operation sa Saint Therese Street, Zone 5, Ilaya, Barangay Carmen, siyudad sa Cagayan de Oro niadtong alas 9:40 Lunes sa gabie, Marso 18.

Patay si Bryan Dabo-dabo, kasamtangang nanimuyo sa Barangay Consolacion ning siyudad kinsa giingong taod-taod na nga gipanid-an sa kapulisan.

Sa nahipos nga impormasiyon gikan sa Police Station 4 (PS4) sa Carmen giingong nagpahigayon ang Regional Drug Enforcement Unit (RDEU) sa pagpangulo ni Police Chief Insp. Ian Datiles og operasiyon hinungdan sa pagkapatay ni Dabo-dabo human nisukol.

Gikabutyag sa usa sa mga tinugyanan sa RDEU nga ang mga parokyano niini mao ang mga bugaw ug mga anaa sa Consolacion. Gidugang pa nga duna kini kauban nga nakamotorsiklo apan nakabantay kini hinungdan nga daling nisibat sakay sa motorsiklo.

Giingong sa dihang nakamatikod ang suspek nga pulis ang gikatransak nibunot kini sa iyang kalibre .38 nga miresulta sa pagbalos sa mga otoridad aron madepensahan ang maong posuer buyer. Nakaangkon og ubay-ubay ka mga samad pinusilan si Dabo-dabo nga miresulta sa kamatayon niini.

Gidala pa kini sa J.R Borja Hospital apan patay na kini sa dihang nahidangat sa balay tambalanan.

Narekober gikan sa posisyon ni Dabo-dabo ang P1000 nga buy-bust money ug pakete sa gitoohang shabu nga gisulod sa pakete sa chewing gum.

Ang maong patay nga lawas ang anaa sa Bollozos Funeral Homes sa Bulua ning siyudad.

Kahinumduman nga niadtong niaging adlaw tulo ka mga lalaki ang napatay usab sa drug operation sa kasikbit nga lungsod sa Misamis Oriental.