KASAMTANGANG anaa sa Bollozos Funeral Homes ang patay nga lawas sa wala pa maila nga kinsa ug gituohang gi hit & run niadtong Hunyo 14, 2018, sa buntag sa Barangay Bulua, dakbayan sa Cagayan de Oro.

Anaa sa 5’1 ang gitas-on, itumon ug patikan ang lawas.

Sa nahipos nga impormasiyon, gikabutyag nga posibleng nabanggaan ang maong lalaki kinsa gitoohang usa ka dispatser.

Nasayran nga napalgan na lamang nga naligo sa kaugalingong dugo ang wala pa maila nga lalaki kinsa gituohang nabanggaan sa usa ka pribadong sakyanan apan gibiyaan lamang kini.

Nakaangkon og mga samad sa nagkadaiyang parte sa lawas ang biktima hinungdan na usab sa hinanali niini nga kamatayon.

Gidala pa kini sa balay tambalanan apan wala’y swerteng nakabsan kini sa hinulamang kinabuhi.

Ang maong patay nga lawas ang kasamtangang anaa pa sa Bollozos Funeral Homes sa Bulua ning siyudad. (KCS)