TINIGBASAN sa ulo ug tuhod nga bahin ang naangkon sa usa ka lalaki nga napalgan na lamang nagbuy-od ug naligo sa iyang kaugalingon nga dugo sa Purok 3, Brgy. Poblacion, lungsod sa Villanueva, Misamis Oriental.

Ang biktima nailhan nga si Rico Tampos, 36, minyo, residente sa susamang barangay.

Sa inisyal nga imbestigasyon sa Villanueva Police Station, nadiskubre ang patay’ng lawas sa biktima alas 4 niadtong Huwebes sayong kabuntagon atubangan sa iyang puloy-anan.

Duha ka samad tinigbasan sa iyang ulo lakip ang samad sa iyang tuhod nga maoy gituohang hinungdan sa iyang hinanaling kamatayon.

Adunay nakamatikod nga alas 3 sa kadlawon adunay tulo ka mga lalaki nga naka-jacket ug naka-bonnet nga nagdagan gikan sa puloy-anan niini.

Sa pagkakaron blanko pa ang kapulisan kung unsay motibo sa pagpanigbas patay ngadto sa biktima.