NALIGO sa iyang kaugalingong dugo ang usa ka lalaki ug nakabsan sa kinabuhi human kini gitigbas sa hubog nga silingan niadtong Nobyembre 15 sa gabii, sa Barangay Maribucao, dakbayan sa Gingoog, Misamis Oriental.

Ang biktima giila nga si Ereneo Alvarez, taga Barangay Talon, susamang dakbayan.

Sa inisyal nga imbestigasyon sa Gingoog City Police Station sa pagpangulo ni Police Superintendent Ariel Phillip Pontillas, unang nadawat ang tawag sa City Disaster Risk Reduction Management Department kalabot sa pagpanigbas.

Naabtan sa polis nga naligo na sa iyang kaugalingong dugo ang biktima ug naghay-ad na kini sa yuta, ug wala nay kinabuhi.

Matud sa kapolisan, miingon ang nakasaksi na si Manuel Cabactulan nga ang biktima natulog na sa lingkoran sa gawas sa tindahan niadtong gabii.

Mao na lamang iyang nasaksihan nga giduolan kini sa suspek nga si Gerry Temblor, residente sa susamang dapit, nga giayo na niini og tigbas ang biktima.

Matud ni Police Superintendent Pontillas nga human sa insidente, ilang gilusad ang hot pursuit operation batok sa suspek nga misibat human sa hitabo.

“Usa ka oras after the incident reported nadakpan ang suspect,” matud ni Pontillas.

Gisuta pa usab karon unsa ang lawom nga hinungdan sa pagpanigbas.

Kasong murder posibleng atubangon sa dinakpan nga anaa na sa prisohan.