PATAY ang usa ka lalaki human giingong misukol sa buy bust operation sa kapulisan niadtong Mayo 24, alas 9:15 sa gabii sa Purok 7, Barangay Sinai, lungsod sa Laguindingan, Misamis Oriental.

Ang kapulisan gikan sa Provincial Drug Enforcement Unit (PDEU),Provincial Intelligence Branch (PIB), Alubijid Police Station kauban ang Laguindingan Police Station mikasa og operasyon batok sa target sa listahan nga mao si Clint Valle, hingkod ang edad, ulitawo, residente sa dapit.

Apan matud ni Police Lieutinant Nilo C. Madestre, deputy station commander sa Laguindingan Police Station, nga dihang nakamatikod si Valles nga pulis ang iyang katransaksyon mibunlot kini sa iyang pistola nga kalibre 38 ug namusil sa poseur buyer nga nasalipdan niadtong tungora maoy hinungdan nga gibaslan ug napusilan sa mga operatiba nga back-up.

Gidala pa sa doul nga balay tambalanan sa dapit si Valle apan dead on arrival kining gideklarar sa mga doktor.

Nakuha sab gikan sa crime scene ang kalibre 38 uban sa duha ka pakete sa gitouhang shabu lakip marked money.

"Ug mosurender sila dili man gyod sila maunsa kay kita kanunay garespeto sa tawhanong katungod," matud ni Madestre.

Dugang niini nga si Valle nag-inusara na lamang sa puloy-anan.

Gani kaduha na kini napriso sa dapit gumikan sa kasong direct assault.

Sa niaging tuig sab lakip kini sa tokhangon apan wala niapil sa drug rehabilitation sa barangay ug namonitor nga padayon sa kalihokang pagpayuhot sa ginadili nga druga.

Ang patay’ng lawas gidala na sa punerarya sa dapit ug gipahaluna na sa iyang pamilya.