NASAPON sa akto nga nagsuyop sa giingong illegal nga druga ang empleyado sa City hall ug kanhi pulis human nga nagpahigayon og joint operation diha sa Macahambus-Burgos Streets, Barangay 15, dakbayan sa Cagayan de Oro.

Ang mga dinakpan naila nga sila si Janus Mark Leyson, 34, ulitawo nga taga Barangay 15 ug kasamtangang empleyado sa City hall isip usa ka liason officer sa City Mayor’s Office ug kauban nga si Rico Gallardo Jr. ,33, ulitawo nga taga Villa Angela, Balulang ning dakbayan ug usa kini ka kanhi sakop sa kapolisan apan na dismiss kaniadto human usab nga nagpositibo sa illegal nga druga.

Sa pakighinabi sa SunStar Superbalita kang P/Chief Insp. Julius Clark Prisco Macariola, hepe sa Police Station 1 (PS1) sa Divisoria gikabutyag nga naaktohan gayud ang maong mga dinakpan nga nag pot session o kamulong suyop sa giingong ginadili nga druga.

Gidugang pa nga nakadawat ang tinugyanan sa Regional Drug Enforcement Unit (RDEU) og inpormasiyon sa nagpakabanang katawhan nga adunay nagsuyop sa maong dapit ug dali usab kining midangop sa PS1 aron sa pakigkoordinar.

“Ang atong taga RDEU naka received sila og information gikan sa concern citizen nga somewhere at Barangay 15 sa Cagayan de Oro nga ana daw nag pot session, upon receiving the information nianhi ang taga RDEU to coordinate with us “ pahayag ni PCI Macariola.

Giingong nasapon gayud ang maong mga dinakpan human nga naghimo sa illegal nga kalihokan.

“So kani ang gi-adtoan man nila is boarding house pero naa’y public pathway sa gilid which ang curtain lang ang naa sa window wala daw suga nakita lang nila ang curtain is dili siya ing ana ka sealed so nakita gyud nila sa gawas nga naa’y gahimo og illegal sa sulod so didto” dugang ni PCI Macariola.

Samtang sa bahin usab sa mga dinakpan pabilin silang nagpakahilom.

Gikonsidera nga High Valued Target (HVT) si Leyson gumikan na usab kay kasamtangan kini nga trabahante sa gobyerno.

Nakuha gikan sa posisyon sa mga suspek ang duha ka mga pakete sa gitoohang shabu ug mga laing mga drug paraphernalia.

Sa pagsulat niini nga balita kasamtangang anaa na sa kustodiya sa kapolisan ang maong mga dinakpan.