PADAYON nga giduso ni Mayor Oscar Moreno si ABC President Yan Lam “Alam” Lim sa pagka-congressman tungod buot niini mahimong kaabag si Lim sa pagpanerbisyo sa dakbayan sa Cagayan de Oro.

Gibutyag ni Moreno nga tinguha niini nga magpapili sa pagka congressman Lim human giangkon niini nga naglisod kini paglihok tungod kay kontra partido niini ang kasamtangang naglingkod nga congressman.

“Gusto ko, kay kinahanglan nato nga congressman nato kaabag, ang importante man gyud sa gobyerno kaabag dili babag,” pahayag ni Moreno.

Gidugang usab ni Moreno nga kaniadto naglisod kini gumikan sa pagbabag sa pipila ka mga konseho ilabi na nila ni kanhi Kagawad Presidente Elipe.

“Ang importante man gud kaabag, ako nalang mismo pagsugod nako gilisod lisod ko nilang Elipe no, grabe gyud dIli tiaw nga obstructionism,” dugang niini.

Giingong nakapadangat gihapon kini sa iyang mga proyekto ug programa apan gumikan sa mga pagbabag hinungdan nga naglisod-lisod kini kaniadto hangtod nga naghinayhinay nga mitapon sa ilang grupo.