GIREKLAMO sa pamilya ang usa ka memorial park kini human nga nadelatar og hapit walo ka oras niadtong nilabay nga semana sa Zone 7, Barangay Bulua, dakbayan sa Cagayan de Oro.

Nidangop sa kapulisan ang usa ka Laarni Picardal, 46, taga Consolacion ning dakbayan human nga nahasol sa paglubong sa ilang pamilya tungod sa palpak nga trabaho sa maong lubnganan.

Sa impormasiyon nga nahipos gikan sa kapulisan sa Police Station (PS) 7 sa Bulua, giingong nidangop sa kapulisan si Picardal ug gireklamo ang nagdumala sa memorial park tungod kay mas doble ang ilang gibati tungod na usab kay niabot sa kapig pito ka oras ayha nalubong ang patay nga lawas ni Alberto Picardal ug ubang mga bukog sa ilang laing kabanay.

Gikabutyag nga niadtong Nobiyembre 2 nakigsabot kini sa maong lubnganan nga ilubong ang maong patay ug laing mga bukog petsa 4 sa Nobyimbre mga alas 3:00 sa hapon.

Nakurat nalang ang mga kabanay ug higala nga niuban sa paglubong tungod kay pag-abot nila sa maong dapit kamulo pa sa pagkalot ang mga trabahante sa lubnganan rason sa grabe nga pagkadelatar nga niabot na og gabii.

Ang insidente nakatala na sa buhatan sa kapulisan ug giduso sa Barangay Lupon alang sa tukmang aksiyon.