NEGATIBO sa ginadili nga druga ang 100 ka mga driver sa gipahigayon nga Project: "Undaspot" Oplan: "Harabas" sa Philippine Drug Enforcement Agency (PDEA)-Northern Mindanao Agora Integrated Terminal, ning dakbayan sa Cagayan de Oro, niadtong Lunes, Oktubre 28.

Kini gilangkoban sa 40 ka mga bus driver, 42 ka mga empleyado sa bus, lima ka driver sa van, ug 13 ka mga taxi driver.

Ang maong kalihokan giubanan sa Land Transportation Franchising and Regulatory Board ug Land Transportation Office aron masiguro nga luwas ang mga pasahero sa ilang padulngan, ilabi na nga nagsugod na sa pagdagsa ang mga pasahero alang sa nagkaduol nga Adlaw sa mga Santos ug Kalag.

Gibutyag ni agent Expedito Cardona ngadto sa prensa nga tumong ug tinguha niini mao ang kaluwasan sa komunidad.

"Ang atong tumong ug tinguha ani is ang safety sa community, while ang atong mga driver, we received report ana lage nalambigit sila sa ilegal nga druga," matud ni Cardona.

Samtang gi-angkon ni alyas Dodong, driver sa taxi, nga naggamit kini kaniadto apan usa na kini ka tuig nga ni-undang sukad nadakpan ug nibutyag nga natagam na kini.

"Dugay naman ko ni-undang. Natagam na human napriso. Mga three months nako nag-drive," matud niini.

Niadtong 2018, duna silay nasikop apan dili usab kini kadaghanan.

Ang magpositibo sa maong random drug testing kuhaan sa ilang lisensiya samtang i-rekomendar usab kining ipailalom sa rehabilitasiyon.