GIPAABOT sa pipila ka mga mayor sa nagkalain-laing lungsod sa Misamis Oriental nga suportado nila ang Kuyamis Festival nga gisugdan sa liderato ni Governor Bambi Emano ug malaumon sab nga mapadayon kung kinsa man ang sunod nga mamunoan.

Si Mayor Jude Puertas, sa lungsod sa Lagonglong, nisulti atol sa Festival Night nga taliwala sa kagamay sa ilang panudlanan sa lungsod, ila kining gipaigoan makasalmot lamang niini nga kalihokan ug mapadayag ug mapaila ang ilang lungsod sa katawhan.

Gipaabot sab ni Mayor Romy Gue, sa lungsod sa Binuangan, nga taliwala sa kagamay sa lungsod ug pabiling anaa sa sixth-class municipality, naningkamot sila nga mapalambo ang ilang turismo aron kini maoy mahimong hinguhaan sa katawhan.

Ning bag-o lang, ang healing pool nga giinagurahan maoy gipasigarbo sa lungsod.

Si Gingoog City Mayor Erick Canosa nipaabot nga unang higayon nga mipartisipar sa Kuyamis Festival ang lungsod.

"We are very happy and very proud that indeed it is very happy in Misamis Oriental," matud ni Canosa ug miingon nga andam siya ug ang iyang dakbayan nga mag-host sa sunod tuig nga selebrasyon niini.

Ang lungsod sa Sugbongcogon sa pagpangulo sa ni Mayor Mildred Mondigo nga maoy usa sa host sa Festival Night malipayon nga nipasigarbo sa iyang lungsod.

Gipaabot niini nga dako og epekto ang turismo sa kalamboan sa lungsod, hinungdan nga ila kining ipadayon.

Sagad kanila atol sa ilang speech nga kakulang gyod sa pundo, apan ila kining gipaningkamotan nga molampos ang kalihokan kay sa umaabot mobalik ra gihapon ang kalamposan niini ngadto sa kalungsoran.