DISMAYADO si Misamis Oriental Sangguniang Panlalawigan Member President Elipe ug Gerardo Sabal sa mga proyekto sa kadalanan sa Department of Public Works and Highways (DPWH) sa Northern Mindanao sa probinsya sa Misamis Oriental.

Tinguha nila nga magpadala og sulat ngadto sa secretary sa DWPH tungod sa dili maayo nga proyekto sa kadalanan.

Pasabot ni Elipe nga dismayado siya kon giunsa sa mga engineers ang pagpalapad sa kadalanan labina sa apektadong mga poste ug kahoy.

Sa dihang naimbitahan ang mga opisyal sa DPWH ug Misamis Oriental Electric Cooperatives 1 ug 2 niadtong sa lunes apan iyang nakita nga nagsegi lang og panghunaw ug tinukloray ang mga opisyal.

“Ang electric coop gaingon dili sila kaibot sa poste kay wala sila kwarta unya ila kuno kuhaon gikan sa DPWH unya ang DPWH pud dili kuno kahatag kay wala kuno ka-submit og list nga verified sa National Electrification Administration (NEA),” dismayadong pahayag ni Elipe.

“Disgusted and disappointed na gyud ko kay nagpaklaro lang nga wala silay klaro nga planning. Nakalimot sila nga they are public servants over and above they being engineers,” matud ni Elipe.

Bag-ohay lang sab nakasaway si Board Member Sabal gumikan kay adunay mga proyekto ang DPWD sa kadalanan nga gibiyaan ilabina kasadpang bahin.

Dismayado kini sanglit naghatag kini og dakong disgrasya dihang ilang gibiyaan ilang trabaho didto sa lungsod sa Initao nga maoy hinungdan sa kamatayon sa tulo niining bag-ohay lang.