GITUOHANG wala maagwanta sa 65-anyos nga lalaki ang iyang pagsunog sa 2 anyos nga anak sa iyang uyab hinungdan nga naghikog pinaagi sa paghikot sa iyang liog nga nadiskubre mga alas 12:15 sa kadlawon Huwebes, Pebrero 13, sa selda sa Maigo Police Station, Lanao del Norte.

Si Florencio B. Curay napalgan sa iyang kaubang priso nga nagbitay na sa alkuba sa comfort room sa istasyon nga naghikot og sling bag sa iyang liog ug wala nay kinabuhi.

Matud ni Police Lieutenant Baltazar Deguilmo, hepe sa Maigo Police Station, nga sukad nadakpan si Curay ug nahuwasan sa kahubog dili na kini motingog ug dili mokaon.

Posibleng gibati o nakonsensya kini og maayo sa iyang nahimo sa 2 anyos nga bata nga iyang gisunog human nga gipasinglan niini ang inahan sa bata nga maoy nagkuha sa nawala niya nga kwarta.

Giingong gibati kini og depresyon sa iyang nabuhat nga krimen ug giatubang nga kaso.

Sa imbestigasyon, nananghid kini nga mag CR apan dihang dugay nakagawas giadtoan sa usa ka kaubang priso ug maoy nakita nagbitay ug wala nay kinabuhi.

Ang sling sa bag nga giingong gipanag-iyahan sa anak niini nga maoy gisudlan og sinina sa suspek.