ARON nga mapugngan ang pagpunsisok sa katawhan sa mga kamerkadohan sa dakbayan sa Cagayan de Oro, planong ilusad ang mobile market.

Giingong nagpahigayon og test run ang tinugyanan sa Agricultural Productivity Office (APO) alang sa mobile market o paghatod sa mga kabarangayan sa mga baligya nga suplay sa pagkaon sama sa mga utanon, lagutmon, karne ug uban pa.

Gibutyag ni Maricel Casiño-Rivera, officer sa City Information Office, nga gikonsidera kini karong panahona labi na nga aron malikayan ang pagdagsa sa katawhan ug mapatuman ang social distancing.

"In the meantime, gi-konsiderar karon ang pamaagi kung unsaon nato magpatuman og usa ka mobile market kay kini siya gatan-awon nato aron nga ma lessen gyud ang tawo nga moadto pa sa kamerkadohan," matud ni Rivera.

Gidugang pa nga tumong nga makahatod sa mga barangay sa mga lagutmon ug uban pa nga mga kinahanglanon mismo sa kabaranggayan.

Samtang base sa economic cluster sa emergency operation center kinsa gamonitor sa suplay sa pagkaon o mga nag-unang panginahanglanon.

Giingong base sa pagmonitor, normal pa ang suplay sa mga pagkaon gawas lang sa karneng baka nga dunay gamay nga pag-ubos.

"Medyo dunay na note nila nga pag-ubos sa supply sa atong karneng baka but on the whole normal pa ang atong mga baligya nga pagkaon diha sa atong kamerkadohan," matud ni Rivera.

Samtang ang suplay sa bugas sa Rehiyon molungtad pa og tulo ka bulan.

"Sa pagkakaron, base sa ilang data duna tay supply nga mo last pa for three months hopefully ma refill ra sad kana siya kung moabot na kita didto sa June," dugang pa.