DAKPAN ang numero unong most wanted person human gisilbi ang warrant of arrest niini sa Barangay Calawag, lungsod sa Balingasag, Misamis Oriental.

Si Police Captain Ismael Virgil Gundaya, hepe sa Balingasag Police Station, niila sa dinakpan nga si Eugene Ignao Sorronio, 27, residente sa dapit.

Matud ni Gundaya, sa interbyu sa SunStar Superbalita, nga ang pagkasikop niini hiniusang operasyon sa ilang buhatan ug sa Provincial Intelligence Branch ug Criminal Investigation and Detection Group sa Misamis Oriental.

Gioperasyonan kini nila tungod kay taod-taod nga nagtago tago kining suspek human nanglugos sa 17-anyos nga dalagita niadtong tuig 2009 sa dapit.

Nagsige kini og langyaw ug dihang nibalik sa lungsod ug sa tabang sa komuninad ilang gisilbi ang warrant of arrest niini sa kasong rape nga giisyu ni Judge Jeoffrey Acebido.

Gipasabot ni Gundaya nga nisakay sa motorsiklo ang 17-anyos dihang gikursonadahan ug lugos niini niadtong tungora kon asa susama lamang sila og pangidaron.

Walay piyansa nga girekomendar ang korte sa kasong giatubang niini.

Matud ni Gundaya nga sunod-sunod ang ilang pagpangdakop sa mga wanted person sa ilang lungsod ug kini tungod sa dakong tabang sa komunidad.

Gihangyo niini ang katawhan sa lungsod nga imbes nga magsige og reklamo diha sa social media itabang kini pagreport mismo sa ilang buhatan kay sila andam kanunay sa pag-aksyon.