NAKATALA og unom ka mga bag-ong kaso sa coronavirus disease (Covid-19) ang Cagayan de Oro, pulos mga local transmissions, sumala sa report sa City Health Office Huwebes, Pebrero 18, 2021.

Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,703.

Sumala ni City Health Officer Dr. Lorraine Nery, sa unom ka mga bag-ong lokal nga kaso, upat ang mga close contacts sa mga pasyenteng nagpositibo sa coronavirus, usa ang lokal authorized person outside residence (Apor), ug usa ang local index nga kaso.

Sa 3,703 nga kinatibuk-ang kaso sa Covid-19 sa syudad, 422 ang mga returning overseas Filipino workers/locally stranded individuals (ROFs/LSIs) ug 3,281 ang mga local transmissions.

Ang Cagayan de Oro adunay 331 ka mga active cases, 54 niini na-admit sa Northern Mindanao Medical Center ug uban pang mga ospital sa syudad ug 277 ang mga outpatients.

Nakatala usab og 38 ka mga Covid-positive nga mga kaso nga karon naka-recover. Anaa na karon sa 3,194 ang ihap sa mga nakarekober nga mga kaso sa dakbayan.

Sa maong numero, 302 ang mga LSIs, 119 ang mga ROFs, ug 2,773 ang mga lokal nga kaso (community: 2,344; Apors: 429).

Ang ihap sa mga namatay sa Covid-19 sa syudad naa sa 178.