GITUBAG ni Misamis Oriental Governor Yevgeny Vincente Emano ang giingong pagsaway ni Cagayan de Oro Mayor Oscar Moreno nga walay ambisyon ang P3 billion proposed budget alang sa tuig 2019 sa Kapitolyo probinsyal.

“Tinuod walay ambisyon mangawat man gud pareha sa iya,” reaksyon ni Emano dihang gipangutana sa mga sakop sa media lakip SunStar SuperBalita kalabot sa maong pamahayag.

Matud ni Emano nga basin nalimot kini nga sa iyang pagsunod sa Kapitolyo Probinsyal nagsunod siya og P1.2 bilyon nga utang.

“Nalimot man siguro siya nga pagsunod ko niya diri sa Kapitolyo nagbilin siya og utang nga P1.2 bilyon ug karon mas prayoridad ko ang magbayad sa iyang biniyaang utang,” dugang niini.

Dugang ni Emano nga taliwala nga walay ambisyon nga patas-an pa ang budget alang sa probinsya daghang programa ug proyekto nagpaabot sa probinsya niini kay deretso sa proyekto ug wala mideretso sa bulsa.

Matud ni Bambi nga miharbat sila og daghang award nga maoy labing dako nga award sa nasod nga si Presidente Rodrigo Duterte mismo usa sa nagtunol ug ang iyang kaatbang taman na lamang sa ambisyon.

Kahinumduman nga mokabat sa P6.5 bilyon ang proposed budget ni Mayor Moreno alang sa siyudad sa Cagayan de Oro.