GIHIMAKAK sa kampo sa New People's Army (NPA) nga ilang binuhatan ang pagputol sa ulo sa usa ka sakop sa Citizen Armed Forces Geographical Unit (Cafgu) military auxiliary forces nga napalgan didto sa Banahaw, Maitum, Tandag City.

Si Ka Sandra, tigpamaba sa NPA Caraga Region, mihimakak niini kay exaggerated kini nga pahayag sa kampo sa sundalo.

Gitouhang gikaon lamang kini sa mananap ug nabulag ang ulo apan wala giputlan. Gikapungot sab niini ang mga report nga daghang nanurender nga daw kamatouran nagkakusog ang ilang pwersa.

Gibakak sab niining adunay mga minor de edad nga niapil apil sa ilang hanay.

Kahinumduman, nadiskubre ang patay nga lawas sa 24 anyos nga si Ryard Badiang, 24, residente Lanuza, Surigao del Sur, ug napulo ka metros gikan sa iyang lawas narekober ang ulo niini didto sa hilit nga dapit sa Banahaw, Maitum, Tandag City.

Si First Lieutenant Jonald Romorosa, ang civil military officer sa 36th Infantry Battalion, niingon nga si Badiang lakip sa walo ka mga indibidwal nga gidagit sa armadong grupo nga gitouhang NPA niadtong Mayo 30. Gani gibuhian ang pito walay labot si Badiang.

Nasayran nga si Badiang kanhi sakop sa NPA nga dihang mibalik sa sabakan sa gobyerno, nahimong usa ka miyembro sa Cafgu.

Gani atol sa pagkadagit niini, anaa kini kamulo sa iyang trabaho samtang kadtong laing pito sa gidagit ang igo lang nagbalsa niadtong tungora.

Positibong naila sa mabdos nga asawa niini si Badiang kinsa anaa na sa pagkadugta apan nailhan gumikan sa gisul-ob nga sinina ug relo.