PATAY ang 54-anyos nga lalaki human nahulog sa gipanday niini nga balay niadtong June 22, alas 9:30 sa buntag sa lungsod sa Villanueva, Misamis Oriental.

Giila ang biktima nga si Padio Galan, lumad nga taga Barangay Aplaya lungsod sa Jasaan, Misamis Oriental.

Sa report sa Northern Mindanao Medical Center (NMMC) ning dakbayan sa Cagayan de Oro diin gidala ang biktima, nasuta nga nagpanday kini og balay sa Villanueva apan kamulo sa pagtrabaho niini.

Wala kini mahawiran sa ibabaw nga bahin hinungdan sa iyang pagkahulog.

Giingong nag-una ang ulo sa biktima. Dali kining gidala sa NMMC ning dakbayan sa Cagayan de Oro apan pag-abot sa naasoy'ng tambalanan gideklarar kining dead on arrival.