NILANDING sa balay tambalanan ang usa ka pastor human gipusil sa wala mailang suspetsado mga alas 2:45 sa hapon, Marso 30, adlawng Lunes sa Purok 2, Barangay Odiongan, siyudad sa Gingoog.

Giila ang biktima nga mao si Jolito Bollosos, usa ka mag-uuma, driver ug pastor sa Baptist Church nga residente sa Sitio Sio-an, Purok A, Barangay Malinao, susamang siyudad.

Sa inisyal nga imbestigasyon nga gihimo sa Gingoog City Police Station sa pagpanguna ni Police Lieutenant Colonel Ariel Phillip Pontillas, nasuta nga kining biktima paingon nga mo drive sa iyang motorsiklo sakay iyang duha ka mga pasahero, apan kalit lang miabot ang usa ka wala mailang suspetsado namusil.

Sa unang higayong pagpamusil, wala kini makaigo apan sa ikaduhang kablit, miigo sa likod dayon kamot sa biktima.

Daling misibat ang suspek sakay sa motorsiklo paingon sa silangan nga direksyon sa dapit.

Ang biktima daling gidala sa Misamis Oriental Provincial Hospital, Gingoog City.

Narekober sa crime scene ang tulo ka mga buhing bala.

Ang kapulisan padayon sa pag-imbestigar sa kaso aron matumbok ang suspek.