GITAKDANG ihaya ang patay nga lawas ni Senator Aquilino “Nene” Pimentel Jr. sa City Hall ning dakbayan sa Cagayan de Oro karong umaabot Oktubre 23 hangtod 25.

Namatay sa edad nga 85 anyos si Pimentel tungod sa gihambing nga sakit nga cancer ilabi na lymphoma ug sakit nga pneumonia niadtong Dominggo, Oktubre 20.

Nasubo ang siyudad sa kamatayon niini ug gani naka half-staff ang nasudnong bandila karong panahona.

Nagpagawas usab og mga nagkadaiyang pahisubo nga mga personahe ug mga opisyal lakip na si Mayor Oscar Moreno.

“The people of Cagayan de Oro and Misamis Oriental would be especially honored to pay our last respects and to give a tribute to Senator Nene here in CDO. As I am sure that our neighbors here in Mindanao would also join us,” sa pahayag ni Moreno.

Gidugang pa nga makig-koordinar kini alang sa ipahigayong mga kalihokan kalabot na niini ug nagpadangat og mga pahisubo labi na sa asawa ug pamilya.

Lakip usab sila si Congressman Rufus Rodriguez, Senator Migz Zubiri, Gobernador Bambi Emano, ug uban pang mga opisyal.

Samtang nibutyag si ABC President Yan Lam Lim nga kung dili tungod ni Pimentel, dili mapasa ang local government code hinungdan nga dakong kawad-on ang kamatayon niini.

“Without him, dili matagaan og kagamhanan ang local government sa iyang pagpasar sa balaod ang atong local government naay power,” matud ni Lim.

Gidugang pa nga dakong kaayo ang tabang niini dinhi sa siyudad.

“Atong i-ampo ang pamilya sa Pimentel. Dako iyang natabang sa siyudad ug labi na kanang local government code,” dugang pa.

Hatagan sa kahigayonan ang mga katawhan nga motan-aw sa patay nga lawas sa kanhi senador.