GIINGONG walay pagsaka sa presyo sa mga palaliton bisan pa man sa nasinatiang weak El Niño o tag-init ilabi na sa siyudad sa Cagayan de Oro.

Giingong sa 289 nga mga basic commodity, 11 lamang niini ang dunay pagsaka sa presyo ug ang 278 ang nagpabilin lamang apan anaa lang usab sa tres porsinto ang pagsaka gikan sa Pebrero 14 hangtod Mayo 4.

Sa pakighinabi kang abogado Edgardo “Egay” Uy, co-chairman sa City Price Coordinating Council (CPCC), nga 11 lamang ang dunay pagsaka.

“Dunay bag-o nga suggested retail price (SRP) nga gi-release ang Department of Trade and Industry (DTI), may 4 nga SRP ni supercede kadto atong February 13 nga SRP duna lang 11 items nga dunay changes,” matud ni Uy.

Gidugang pa niini nga wala nisaka ang mga presyo gani anaa lamang sa tres porsyento o average nga dili molapas sa P5.

“Generally maintain, majority kay wala nausab ang SRP, ga monitor man gihapon ang DTI daily. Naay mga tindahan nga mosobra gamay sa SRP but immediately e-correct man dayon nila,” dugang niini.

Padayon ang pag monitor karon sa tinugyanan sa DTI lakip na sa City Price Coordinating Council aron nga walay mag-abuso sa mga presyo sa mga palaliton.