GIBUTYAG sa Department of Trade and Industry (DTI) nga wala nagkulang ang mga produkto alang sa Noche Buena bisan pa man nga naa ang isyu sa African Swine Fever (ASF) alang sa nagkaduol nga Pasko.

Kini ang gibutyag ni Rozanne Marie San Juan, trade and industry development specialist sa DTI, kinsa niingon nga dili angay mabalaka ang katawhan.

"Simula tong nigawas ang SRP for Noche Buena products, ha-om man, maayo man atong stocks, atong supply for everyone para sa pasko," matud ni San Juan.

Samtang gidugang usab ni Corcodia Acosta, OIC sa DTI, nga bisan pa man ASF ug kamandoan sa temporaryong pag-ban sa produktong baboy, paigo ang suplay sa siyudad ug sa probinsiya tungod na usab kay duna may mga lokal nga suplay.

"Naa biya pud tay lokal ha nga Slers, ang makapabor gyud sa ASF ang atoang lokal, dayon kampante gyud ang mga tao nga mopalit kay diri ra sa ato," matud ni Acosta.

Kahinumdoman nga gisusi sa City Price Coordinating Council ang mga produktong pang-Noche Buena lakip na sa DTI ug sa anti-task force aron malikayan ang sobrang pagtaas sa mga presyo sa palaliton ug masuta nga walay nakasulod nga produkto nga apektado sa ASF.