DUHA sa 15 ka mga patigayon nga gisusi sa tinugyanan sa Regulatory and Complaint Board (RCB) ang nakalapas sa balaod diin wala kini permit niadtong Marso 28 sa gabii dinhi sa siyudad sa Cagayan de Oro.

Gi-isyuhan na og notice of inspection findings ang maong duha ka mga bar.

Sa pakighinabi kang Antonio Resma Jr., Inspectorate Team leader sa RCB gibutyag niini nga malampuson ang ilang gihimong inspeksiyon.

“Generally successful gabii (Marso 28). Out of more or less 15 establishments na inspect sa Board mismo gabii duha ra ani ang walay permit sa bar, but naay permit as restaurant,” matud ni Resma.

Gidugang pa niini nga nadismaya kini ilabi na nga aduna gihapon silay nasapon nga menor de edad nga nag-inom ug usa ini babaye.

“Then naay isa ka minor ato na rescue nga nag-inom sa isa ka bar. Naka-issue na sad ta og notice of inspection findings,” dugang niini.

Nasayran nga hugot ang kampanya sa lokal nga kagamhanan sa siyudad ilabi na sa RCB nga maprotektahan ang mga kabataan sa ka-alaot ug mga pagpangabuso sama sa trafficking ug uban pa.