GIPATAWAG sa komitiba sa Environment sa Sangguniang Panlalawigan ang giingong responsable sa "oil spill" sa kadagatan sa lungsod sa Jasaan, Misamis Oriental.

Sa pagpanguna ni Board Member Gerardo Sabal, iyang gipatawag ang Pilipinas Kao, Bureau of Fisheries and Aquatic Resources ug Local Government Unit (LGU) sa Jasaan, ug dinhi nakumpirma nga adunay paglapas sa usa ka barko sa paglabay og makadaut nga likido sa baybay.

Giingong ang Philippine Coast Guard ug Bureau of Fisheries and Aquatic Resources naghimo sa ilang kaugalingon nga lakang aron maimbestigahan ang insidente ug nasuta kini dihang miangkon mismo ang nanag-iya sa barko nga "Hugo N" sa ilang salaod.

Giingong gahatod kini og mga raw materials gikan sa laing nasod paingon sa kompanyan sa lungsod.

Niadtong Enero 10, nadiskubre sa mga residente ang giingong oil spill ug sa pag-imbestigar sa PCG nasuta nga usa kini ka sabon nga gilimpyo sa deck ug didto gibuhos sa kadagatan.

Naghatag kini kabalaka sa pipila ka residente tungod kay hinay-hinay nga nangamatay ang fingerlings sa bangus niadtong tungora.

Sa pagsusi sa PCG Marine Environmental Protection Unit, nakuha sa water sampling sa apektadong bahin sa dagat nga normal kini ug gisuta pa kung kadtong pagkamatay sa mga isda epekto sa nabuhos nga likido.

Sa iyang bahin si Board Member Sabal, malaumon nga unta dili na kini masubli. Suportado sa lalawigan ang katukoran ug kalamboan sa industriya apan gihinaot nga ang nga nanag-iya likayan ang mga butang nga makadaot sa panglawas sa katawhan ug labina sa kinaiyahan.

Laumang adunay ipahamtang nga multa ang PCG ug BFAR ngadto sa tag-iya sa barko.

Mahibaloan ang kantidad sa multa niini karong umaabot petsa 5, 2020 sa Pebrero kon diin matigayon ang final hearing niini.