PIPILA ka mga Kagayanon nagkahiusa nga dili lang matangtang sa serbisyo pagka-konsehal sa dakbayan apil nga mapapahawa sa Siyudad sa Cagayan de Oro si Konsehal Zaldy Ocon.

Kini human sa insidente nga giingong pagsinggit-singgit ni Ocon sa kanhi amahan sa dakbayan nga si kanhi mayor ug abogado Reuben Canoy.

Apan dili lang diha nagsugod ang ilang buot pagpalagpot ni Ocon apan tungod sa giingong dili maayong taras nga gipakita niini sa Kagayanon.

“We are opening and launching this signature campaign kay gusto gyod namo nga mapapahawa kay dili lang sa council apil gyod diri sa Cagayan de Oro because he is not in this place,” matud ni Tessa Padla kinsa businesswoman ug nagsilbing tigpamaba sa “Remove Ocon Movement” atol sa interbyu sa SunStar Superbalita.

“Nakita namo nga gahasik og lagim, kana iyang sinultihan, kung mag turn-on mis radyo ganahan mi sa perspective unya abayan sa kangil-ad sa words nga gapangawas sa iyang baba,” dugang ni Padla ug miingon nga gihimo kini dili tungod kay mayor iyang gibinastos apan usa ka tigulang na.

Giklaro niini nga walay political involvement niini tungod kay daghan sila karon nagsugod sa signature campaign nga lain-lain ug baruganan niadtong eleksyon apan nagkahiusa sa pagpalagpot kang Ocon.

Dugang niini nga molungtad hangtod Hunyo 30 ang signature campaign aron makatigom og 50,000 ka pirma gikan sa mga rehistradong botante sa Distrito Uno sa siyudad kay usa kini nga ground aron makapatangtang sa iyang posisyon sa konseho.

Giklaro sab ni Padla nga wala sila gibayran o gisugo sa pamilyang Canoy kay kaugalingon kabubut-on nga magkatapok ug magkatigom aron ipadayon kini nga kausa.

“Walay nagsugo namo, kami ang nangusog kay sa iyang gihimo...dako nga tao iyang giingon ato gisinggit-singgitan unsa nalang ang majukmok,” dugang ni Padla.

Gipaabot niini nga anaa ang paglikom og pirma diha sa Press Freedom Monument kada adlaw sa alas 7 sa buntag paingon sa alas 8 sa gabii kutob sa Hunyo 30.