SUBAY sa kasaulogan sa Business Continuity Awareness Week nagpahigayon og Mass Assembly for Rescue and Care for Humanity (MARCH) rescue challenge nga gihimo sulod sa Steag State Power Incorporated sa lungsod sa Villanueva, Misamis Oriental.

Ang nagpahigayon og capability demonstration gihimo sa mga dinapit nga partisipante sama sa Philippine Red Cross, rescue team sa State Power Inc. (SPI), Bureau of Fire Protection-Northern Mindanao (BFP-10), Philippine National Police (PNP) sa Misamis Oriental, Tagoloan ug Villanueva Municipal Distaster Risk Reduction Management Office (MDRRMO).

Gibutyag ni Jerome Soldevilla, tigpamaba sa STEAG, nga ang awareness week tinuig na nilang gaipahigayon samtang unang gihimo ang march rescue challenge.

Matag tuig lain-laing kalihokan ang ilang gaipahigayon kini agi og pagpangandam sa bisan unsa man nga posibleng pagpanabotahe o mga insidente nga mahitabo sulod sa planta.

Dugang niini, kinahanglan nila nga protektahan ang ilang planta labi na nga ang power supply gikinahanglan sa pulo sa Mindanao.

"Importante kaayo siya tungod kay sayod man kita mga power plant, sama sa STEAG, usa ka vital installation kinahanglan nga andam kita kanunay. We believe nga we are ready, we are capable. We don't want to happen nga mag-shut down gyod ang planta," matud ni Soldevilla.

Dugang niini nga kumpleto sila sa himan sa pang emerhensya hinungdan andam sab sila motubag sa mga emerhensya sa kasikbit nga dapit sa lalawigan kon sila gikinahanglan.

Gani ning bag-o lang nakaresponde ang STEAG og tulo ka insidente sa sunog sa dapit.