TULO lamang ka kilo sa bugas matag usa ka tawo sa matag adlaw ang mahatag sa National Food Authority (NFA)-Northern Mindanao tungod sa pagkanihit sa suplay.

Kini mapalit sa mga merkado ug mga outet retailers sa NFA nga bugas sa P27 ngadto sa P32 ang matag kilo.

Gibutyag ni Hazel Belacho, tigpamaba sa NFA-Northern Mindanao, nga magpabilin lamang nga duna gayud limitasyon sa ilang iapod-apod.

Matud niini nga niaging semana, moabot ngadto sa tulo ngadto sa lima ka mga kilo ang naapod-apod sa kamerkadohan tungod kay dili sab mahimo nga usabon ang alokasyon sa bugas tungod kay sila maoy papanubagon niini.

Ang gihimo sa NFA mao ang pagbahin-bahin na lamang niini ug gipabantayan nga ang mga mamalitay dili na magsige og balik-balik sa pagpalit labina nga daghan ang gakinahanglan niini.

Dugang niini nga aduna silay mga empleyado nga nag-monitor niini ug nakitang sakto ug regular ang distribusyon alang ngadto sa mga mamalitay.

Nasayran nga dili lamang sa Northern Mindanao nakasinati og pagkanihit sa suplay sa bugas kundili halos sa tibuok nasud.