GIPALAPDAN sa Cagayan de Oro City Local Environment and Natural Resources Office (Clenro) ang kampanya kalabot na sa solid waste management dinhi sa siyudad, hinungdan nga atol sa parada, gipahimoslan ang kahigayonan nga mapahibalo ang katawhan.

Nasayran nga siyento porsyento ang tinugyanan sa Clenro ang nagkatag sa kadalanan atol sa parada ug gani lakip usab kini sa contingents sa Higalaay street parade and floats (civic military parade) aron sa pagpamadlong sa mga katawhan nga makitang maglabay og basura.

Gibutyag ni Engr. Armen Cuenca, head sa Clenro, nga full force sila atol sa managlahing parada ug gani nagkatag ang mga sakop niini diin nagdala og mga garbage bag.

Gidugang pa nga gani napuno ang sakyanan sa IPM og basura human sa parada niadtong bisperas sa kapistahan sa siyudad.

Gidugang pa nga nagkatag ang empleyado sa Clenro dili aron sa pagsunod ug pagpamunit sa mga basura apan aron sa pagpahibalo ug pag-edukar sa katawhan nga dili magpataka og labay.

Giingong pinaagi niadtong pagpamadlong, mahinay-hinay na sa pagpahibalo ang katawhan nga sunod tuig hingpit na nga ipatuman ang ordinansa sa dakbayan diin aduna na’y multa ang mogamit sa cellophane ug maglabay og basura bisan asa.