MALINAWON ang paghulagway sa kapulisan sa Traslacion sa Itom nga Nazareno atol sa kapistahan niini Myerkules, Enero 9, dinhi sa siyudad sa Cagayan de Oro.

Gibutyag ni Police Superintendent Mardy Hortillosa, tigpamaba sa Cagayan de Oro City Police Office (Cocpo) nga malinawon ang kalihukan tungod usab sa dakong kooperasyon sa katawhan.

“Nalipay kita kay cooperative kaayo ang atong mga deboto. Mosinyas mi sa ilaha sa bawal ila dayon nga huboun sama anang pagsul-ob og kalo ug uban pa,” matud niini.

Mapasalamaton usab si Hortillosa sa kapulisan, kasundalohan ug tanang barangay tanod nga naghatag og seguridad sukad pa niadtong adlawng Martes hangtod kagahapong adlawa.

Dugang niini nga walay mga dagkong insidente o mga dugoun nga namonitor gawas lamang sa duha ka mga deboto nga nakuyapan. Usa niini hingkod na ang edad ug 15 anyos nga minor de edad.

Hapsay usab ang dagan sa prosisyon ug wala sab namatikdan nga nagsinikohay o nagtinuklora.

Niining Traslacion lakip nga misalmot ang Iglesia Filipina Indepiendente ubos ni Archbishop Felixberto Calang.

Una na nga misulti si Reverend Father Julius Clavero ang kura paruko sa Jesus Nazareno Shrine nga nakadayig siya sa mga deboto sa Cagayan de Oro tungod kay mga disiplinado.

“Magpasalamat ta sa CdeO kay we are starting on the right way nga dili gubot ang mga tao walay sinikohay, dili inilogay at least, nakasugod ta nga hapsay ug orderly atong traslacion and we hope to keep it that way nga dili moabot ang time nga magkabugot nga magtinumbanay na magsinikaray na wala na sa ato sukad nahitabo ug pasalamat ta ana,” matud ni Clavero.