PATAY ang usa ka dispatser human giluba sa sidewalk vendor tungod kay nidumili pagbayad sa utang dihang gipaninglan niadtong Hunyo 22 mga alas 8:35 sa gabii sa Barangay 32, siyudad sa Cagayan de Oro.

Ubay-ubay ka mga samad ang naangkon ni Richard Balgoma, 29, ulitawo ug usa ka dispatser diha sa Justo Ramonal Street, Barangay 32.

Gitumbok nga suspetsado mao si Rene Camareño, 42, dunay kaipon ug usa ka sidewalk vendor diha sa may Capt. Vicente Roa street.

Sa pakighinabi sa SunStar Superbalita kang Camareño, gibutyag niini nga siya nagmahay sa iyang gihimo tungod kay una siyang gisukmag ni Balgoma.

"Gisumbag ko niya og una, dako man siya sa ako, taas sa ako wala koy mahimo kung single-single mi, siya nanumbag sa ako, ako siya gidunggab," matud ni Camarero.

Gidugang pa nga naa kini utang kaniya nga mga anaa sa P3 mil ug giingong ginakuha pa ang kwarta niini.

"Tungod sa kadaghan sa iyang utang wala mahibaw-i, wala ko magmahay kay gi-unhan man ko niya, sige lang man kaon sa saging lakatan di siya mobayad, gipanilngan nako nasuko siya," dugang niini.

Nakaangkon og daghang samad sa tiyan si Balgoma hinungdan nga patay na kini nga nadala sa Northern Mindanao Medical Center.

Ang suspek kasamtangang nagtingkagol sa mini-cell sa Police Station 2 sa Cogon.