WALAY puwas ang paghakot ni Erwin Mancao og mga medalya gikan sa iyang malampusong kampanya sa bag-uhay lang nahuman nga Palarong Pambansa ug Philippine National Games.

Nalangkat ni Mancao og tagsa ka gold ug silver sa 2018 Philippine Athletics Track And Field Association (Patafa) National Open niadtong Mayo 31 sa Ilagan City, Isabela.

Nakuha ni Mancao ang sa 5,000 meter run men sa 16.04 minutes ug gipildi niya ang iyang kaugalingong oras nga 16 minutes ug one second pag-angkon niya og gold sa Vigan Palarong Pambansa niadtong Abril.

Mas taas pa ang iyang natalang oras sa PNG didto sa Cebu City nga 16 minutes ug 31 seconds.

Naangkon usab ni Mancao ang silver pag-oras niya og 4.06 minutes sa 1,500 meter run.

Si Mancao usa ka estudyante sa Villanueva National High School ug nirepresentar sa Cagayan de Oro atol sa PATAFA Open.

Nakakuha sab og silver ang iyang kauban nga si Sheinne Sanchez sa shotput.

Niabot iyang labaw ngadto sa 10.2 meters aron makaangkon og medalya.

“We are happy for Mancao and Sanchez and we are proud of supporting them,” matod ni City Sports coordinator Jaymar Rivera.