WALA nagmahay si coach Agustin Yasay nga wala makalanding ang iyang Northern Mindanao Regional Athletic Association (NMRAA) lady cagers og medalya paghuman sa 2018 Palarong Pambansa sa Vigan City, Ilocos Sur.

Kini, tungod nilanding lang sila sa ika-upat nga pwesto human giparot sa Calabarzon ang NMRAA cagebelles, 97-92, alang sa away sa bronze sa secondary girls basketball niadtong Biyernes, Abril 20.

“I have nothing to say sa girls nako. They did a great job ug wala ko’y makaingon but say good job sa ila,” ingon ni coach Yasay sa ilang gipakitang katakos.

Sila ra nga basketball team sa NMRAA nga nakalahos ngadto sa semfinal, diin gipaluhod sila sa mas kusog nga National Capital Region Athletic Association, 63-100.

“Tag-as sab kaayo ang NCR,” ingon ni Yasay, kinsa nakontento sa iyang lakaw pagka coach sulod sa lima ka tuig.

Ang duha pa ka teams sa NMRAA nga ang secondary ug elementary boys kutob lang sa quarterfinals sa ilang kadaiyang kategoriya.

Apan, gipasigarbo ni Yasay ang ilang kadaogan sa quarterfinal diin ilang gipilde ang Central Luzon Regional Athletic Association, 98-91.

Nibida sila Shiela Mae Godez ug Aloha Betanio diin nibomba sila og pito ug unom ka tres, sunodsunod, sa kadaogan ug moabante sa semifinal.

“Mao na nga dula nga best remembered sa among katakos,” nagkanayon si Yasay.

Ilang sentro nga si Pritzi Anana gidala sa ambulansya tungod sa kakapoy pagbundol kontra sa katag-as sa Central Luzon, samtang si power forward Honey Janobas nahutdan og foul diin nabinlan lang ang NMRAA og gagmay nga linya.

Apan, naa sila Godez ug Betanio naghasik sa opensiba sa NMRAA aron molanding sila na semifinal.

Igo lang nakatungtong ang NMRAA sa ikaduha nga pwesto sa ilang bracket nga adunay 2-1 win-loss card aron moabante sa quarterfinal.

Konswelo lang sa NMRAA, nanganlan si Godez isip 3-point queen.